Morðrannsókn: Húsleit hjá grunuðum manni

Húsleit var framkvæmd í gærkvöldi heima hjá grunuðum manni, sem var handtekinn og yfirheyrður vegna morðmálsins í Hafnarfirði stuttu eftir að morðið var framið. Þetta kemur fram á fréttamiðlinum Pressan.is.

Maðurinn var sá fyrsti sem var handtekinn og haldið yfir nótt vegna málsins en hann er á þrítugsaldri.

Samkvæmt Pressunni fór fjölmennt lið lögreglu með tæknibúnað inn á heimilið á ellefta tímanum í gærkvöldi.

Nokkrum lögreglubílum var lagt utan við heimilið á meðan rannsókn stóð. Upp undir tíu manns í hvítum samfestingum önnuðust tæknivinnuna.

Ekki náðist í yfirlögregluþjón lögreglunnar á höfuðborgarsvæðinu vegna málsins né verjanda mannsins.