Segir tryggingareksturinn traustan

Ólafur Njáll Sigurðsson, framkvæmdastjóri fjármálasviðs Sjóvár Almennra, segir að tryggingarekstur Sjóvár sé traustur. Fall Avant muni engin áhrif hafa á viðskiptavini Sjóvár. Eins og greint var frá í Fréttablaðinu í dag hefur Eygló Harðardóttir, þingmaður Framsóknarflokksins, óskað eftir fundi í viðskiptanefnd Alþingis vegna mögulegra áhrifa slitameðferðar Aska Capital á stöðu Sjóvár-Almennra.

Ólafur Njáll segir að á meðal eigna sem stofnendur lögðu Sjóvá til við stofnun hafi verið skuldabréf Askar Capital og skuldabréf Avant. Hann segir að skuldabréf Aska sé tryggt með bréfum með ábyrgð ríkissjóðs og því muni fall Aska ekki hafa nein áhrif á Sjóvá. Skuldabréf Avant sé tryggt með annars konar tryggingum sem tryggi skuldina að hluta en félagið muni ekki fara undir lágmörk FME vegna falls þess félags. Auk þess hafi stærstu eigendur ábyrgst að félagið muni standast skilyrði FME um eigið fé og gjaldþol með því að leggja félaginu til aukið fé ef þess þarf. Félagið hafi verið í nánu sambandi við FME vegna þessa máls.