Flest tryggingarfélög skiluðu hagnaði í fyrra

Samanlagður hagnaður skaðatryggingafélaga sem starfandi voru í árslok 2009 var um 2,5 milljarðar kr. Þar af hagnaðist Viðlagatrygging, sem er ríkisstofnun sem starfar samkvæmt sérlögum og býr við sveiflukennda starfsemi, um rúma 3 milljarða kr. Flest tryggingarfélög skiluðu hagnaði í fyrra.

Þetta kemur fram á vefsíðu Fjármálaeftirlitsins  þar sem birt hefur verið yfirlit um rekstur tryggingarfélaganna á síðasta ári. Þar segir að sé horft framhjá Viðlagatryggingu töpuðu skaðatryggingafélögin samanlagt um 669 milljónum kr.

Tapið stafar að mestu leyti af tapi af fjármálarekstri, sem nam 2,5 milljarða kr. Það tap má rekja til afskrifta óefnislegra eigna um 6,7 milljarða kr. hjá Sjóvá-Almennum tryggingum hf. sem valda því að það félag var rekið með tapi. Önnur skaðatryggingafélög skiluðu hagnaði af starfsemi sinni á árinu 2009.

Breytingar hafa orðið á skaðatryggingamarkaði sem gera samanburð við heildartölur síðasta árs erfiðar. Sjóvá Almennar tryggingar hf. hætti vátryggingarekstri og var vátryggingastofn þess færður í nýtt félag með nafninu Sjóvá-Almennar tryggingar hf. Eldra félagið heitir nú SJ Eignarhaldsfélag hf. Einungis er birtur ársreikningur fyrir nýja félagið í yfirlitstölum Fjármálaeftirlitsins.

Eignir félaganna höfðu þegar verið færðar töluvert niður á árinu 2008 þannig að smávægileg hækkun varð á árinu 2009. Án Viðlagagatryggingar námu eignir skaðatryggingafélaganna 101 milljarði kr. í árslok 2009 en voru 98 milljarðar kr. í árslok 2008.

Eigið fé skaðatryggingafélaganna hækkaði verulega á milli ára, úr 5,5 milljörðum kr. í 33 milljarða kr.  Þessi hækkun skýrist að mestu leyti af stöðu Sjóvár Almennra trygginga hf. í árslok 2008 og 2009.  Í árslok 2008 var eigið fé Sjóvár Almennra trygginga hf. neikvætt um 16 milljarða kr.  Á árinu 2009 var vátryggingastofn Sjóvár fluttur til nýs félags sem ber sama heiti og eldra félagið.  Hlutafjárframlag eiganda nýja félagsins var ríflega 15 milljarðar kr. 

Staða eigin fjár Sjóvár í árslok 2008 gaf því ranga mynd af samtölu eiginfjárliða skaðatryggingafélagana á árinu 2008.  Auk þess má geta að nýir eigendur Varðar trygginga hf. lögðu félaginu til nýtt hlutafé á liðnu ári.  Önnur skaðatryggingafélög hafa skilað jákvæðri rekstrarafkomu samfellt til nokkurra ára. 

Fjármálaeftirlitið birtir nú í fyrsta skipti upplýsingar um sjóðstreymi vátryggingafélaga. Handbært fé skaðatryggingafélaganna (án Viðlagatryggingar) lækkaði um 1,5 milljarð kr. á árinu 2009. Einungis eitt skaðatryggingafélag greiddi arð á árinu 2009, Íslensk endurtrygging hf. greiddi rúmlega 11 milljónir kr.

Öll líftryggingafélögin 5 voru rekin með hagnaði á árinu 2009. Samanlagður hagnaður félaganna var 1,7 milljarðar kr. sem er 13,6% hærra en á síðasta ári. Þar af var hagnaður af líftryggingarekstri 1,5 milljarður kr. eða 15,2% hærri en á síðasta ári. Hagnaður af fjármálastarfsemi var rétt rúmlega 300 milljónir kr. sem er 5,8% lækkun frá síðasta ári.

Tvö líftryggingafélög greiddu arð á árinu 2009, Líftryggingafélag Íslands hf. greiddi 500 milljónir kr. og Okkar líftryggingar hf. greiddu 300 milljónir kr. Handbært fé líftryggingafélaga lækkaði um tæpa 3 milljarða kr.

Bókfærð iðgjöld skaðatryggingafélaga námu samtals tæplega 42 milljarðar kr. sem er 7,7% hækkun á milli ára. Þar af kemur tæplega helmingurinn, eða rúmlega 20 milljarðar kr. frá ökutækjatryggingum. Tjón ársins 2009 námu 35 milljörðum kr. í skaðatryggingum, sem er 11,6% lækkun frá síðasta ári. Hagnaður af rekstri skaðatrygginga var 3,8 milljarðar kr. en ef horft er framhjá Viðlagatryggingu nam hagnaður 1,9 milljarði kr.

Hagnaður af rekstri ökutækjatrygginga var 1,7 milljarður kr., sem er 27,2% hækkun á milli ára. Hagnaður af lögboðnum ökutækjatryggingum var 1,4 milljarðar kr. sem var tæplega 40% verri afkoma en árið á undan. Hins vegar skiluðu frjálsar ökutækjatryggingar hagnaði í fyrsta skipti í mörg ár, hagnaður var 232 milljónir kr.