Sérfræðingur: Langt þar til Ísland losnar undan skuldaokinu

Danski bankasérfræðingurinn Jörn Astrup Hansen segir að íslenska bankakerfið sé enn í öndunarvél og það muni líða langur tími þar til Íslendingar losna undan því skuldaoki sem bankakerfið skóp þeim fyrir hrunið haustið 2008.

Þetta kemur fram í viðtali Jyllands Posten við Hansen en hann er sérfræðingur í íslenskum efnahagsmálum og hefur rannsakað bankahrunið. Hann skrifaði m.a. viðauka við skýrslu Rannsóknarnefndar Alþingis.

„Það sem kom mér mest á óvart var stærðargráðan á viðskiptum bankanna við eigin hluthafa og viðskiptin sem bankarnir áttu við eigin starfsmenn," segir Hansen.

„Það er einnig furðulegt að sjá hvernig bankarnir fjármögnuðu aðaleigendur banka sem voru í samkeppni við þá. Þá kemur verulega á óvart hversu mikið af þessum lánum voru án nokkurra trygginga."

Fram kemur í máli Hansen að bankakreppan á Íslandi skildi þjóðina eftir með gríðarlegar skuldir. „Það mun líða langur tími þar til íslenska þjóðin losnar undan þessu skuldaoki, bæði með og án Icesave," segir Hansen.