Lyf og heilsa ætlar að leita til dómstóla

Yfirlýsingin að öðru leyti hljóðar svo: „Lyf og heilsa lýsir furðu sinni yfir ákvörðun Samkeppniseftirlitsins um brot fyrirtækisins á samkeppnislögum. Apótek Vesturlands á Akranesi kvartaði til Samkeppniseftirlitsins yfir að Lyf og heilsa lækkaði verð á vörum í verslun sinni á Akranesi haustið 2007 til að koma til móts við neytendur. Stuttu síðar framkvæmdi Samkeppniseftirlitið húsleit í húsakynnum Lyfja og heilsu.

Á þeim tímapunkti hafði Apótek Vesturlands náð 40-50% markaðshlutdeild á Akranesi á einungis örfáum mánuðum. Við teljum því fráleitt að aðgerðir okkar hafi á einhvern hátt leitt til óeðlilegra samkeppnisaðstæðna. Lyf og heilsa telur einsýnt að meint markaðsráðandi staða getur ekki hafa verið til staðar þar sem fyrirtækið tapaði helming af markaðshlutdeild á stuttum tíma.

Verðlækkun Lyfja og heilsu hafði í engum tilfellum í för með sér að vöruverð færi undir kostnaðarverð heldur var um að ræða lækkun á ákveðnum vörum til að mæta samkeppni. Lækkanir tóku gildi eftir að Apótek Vesturlands opnaði og í kjölfar þess að upplýsingar bárust frá viðskiptavinum um að Apótek Vesturlands hefði lækkað vöruverð sitt. Slíkt kallast eðlileg samkeppni. Það er raunar með ólíkindum að fyrirtækið sé dæmt fyrir brot á samkeppnislögum þegar það bíður lægri hlut í samkeppninni og er í raun gert ókleift að taka þátt í virkri samkeppni.

Markaðshlutdeild Lyfja og heilsu er um 35%. Samkeppniseftirlitið telur þrátt fyrir þetta að Lyf og heilsa sé með "sameiginlega" markaðsráðandi stöðu á höfuðborgarsvæðinu en verður þá að taka aðal samkeppnisaðilann Lyfju með í þá skilgreiningu. Sú skilgreining er síðan yfirfærð yfir á allt annan markað á Akranesi. Lyf og heilsa og Lyfja eru í samkeppni og engin tengsl eru á milli félaganna. Sú "sameiginlega" markaðsráðandi staða er talin hafa áhrif á markaðinn á Akranesi en Lyfja rekur enga lyfjabúð á Akranesi.

Samkeppniseftirlitinu er ætlað að standa vörð um hagsmuni neytenda. Með ákvörðun sinni hindrar Samkeppniseftirlitið fyrirtækið í að stunda eðlilega samkeppni og leggur á íþyngjandi viðurlög. Aðgerðir Samkeppniseftirlitsins hafa leitt til þess að líkur eru á að einungis eitt apótek starfi á Akranesi með sérstökum stuðningi eftirlitsins.

Þá gerir Lyf og heilsa alvarlega athugasemd við undirbúning að húsleit þeirri er Samkeppniseftirlitið framkvæmdi í höfuðstöðvum Lyfja og heilsu haustið 2007. Samkvæmt þeim gögnum sem fyrir liggja þá var sú húsleit einvörðungu byggð á viðtali við Ólaf Adolfsson einn af eigendum Apóteks Vesturlands, á netmiðlinum dv.is. Vandaðri undirbúningur hefði leitt í ljós að forsendur fyrir markaðsráðandi stöðu Lyfja og heilsu voru ekki til staðar á Akranesi.

Með afar ósmekklegum hætti hefur þeim skilaboðum verið komið á framfæri að keðjan Lyf og heilsa sé að klekkja á einyrkjanum Ólafi Adolfssyni. Hið rétta er að Apótek Vesturlands er í meirihlutaeigu Guðmundar Reykjalíns og Hjördísar Ásbergs sem bæði eru athafnamenn í íslensku atvinnulífi.

Samkeppniseftirlitið bæðir rannsakar mál og tekur íþyngjandi ákvarðanir. Það þykir okkur óeðlilegt og er raunar á skjön við það sem gerist í löndunum í kringum okkur.

Því virðist að sektarákvörðun Samkeppniseftirlitsins sé réttlæting fyrir ákvörðun um húsleit sem byggð var á afar hæpnum forsendum. Ekki er vitað til að nokkurri húsleit Samkeppniseftirlitsins hafi lokið með því að stofnunin dragi ákvarðanir til baka um sekt sem vekur upp spurningar um vinnubrögð."