Landsbankinn endurútreiknar gengistryggð fasteignalán

Landsbankinn hefur hafið endurútreikninga á fasteignalánum í samræmi við gengisdóminn sem féll í dag.

Samkvæmt tilkynningu frá bankanum þá var hafist handa við endurútreikningar á fasteignalánum í framhaldi af tilmælum Fjármálaeftirlitsins og Seðlabanka Íslands frá 30. júní sl. en þá lýsti Landsbankinn því yfir að hluti fasteignalána bankans teljist gengistryggð lán.

Á meðan endurútreikningum stendur munu viðskiptavinir enn þá greiða 5.000 krónur af hverri milljón upprunalegs höfuðstóls fasteignalána

Þá segir í tilkynningu frá bankanum: „Dómur Hæstaréttar nú leiðir ekki til þess að hluthafar bankans þurfi að leggja Landsbankanum til nýtt eigið fé þó enda eru áhrif af þessum dómi óveruleg. Á hinn bóginn hafa fyrrnefndir dómar Hæstaréttar í þessum málum nokkur áhrif á SP- Fjármögnun hf., dótturfélag bankans. Landsbankinn mun hins vegar styðja SP- Fjármögnun hf. þannig að staða viðskiptavina fyrirtækisins verði trygg."

Í tilkynningunni segir að endurútreikningur lána muni taka töluverðan tíma og ekki er ljóst hvenær honum lýkur. Landsbankinn mun hraða endurútreikningi eins og hægt er. Viðskiptavinir bera engan kostnað af töfinni.

Á meðan á endurútreikningi stendur býðst viðskiptavinum að greiða 5.000 krónur af hverri milljón upprunalegs höfuðstóls fasteignalána. Þá geta þeir greitt af lánunum miðað við skilmála þeirra kjósi þeir það frekar.

Landsbankinn mun reikna lánin miðað við verðtryggða og óverðtryggða vexti Seðlabanka Íslands. Viðskiptavinir geta svo valið þá leið sem þeim er hagfelldari. Kjósi þeir að bera endurútreikning bankans undir þriðja aðila er það að sjálfsögðu heimilt.

Þegar endurreikningi er lokið mun Landsbankinn bjóða viðskiptavinum nýjan samning um eftirstöðvar láns þeirra. Kjósi viðskiptavinir að hafa lán sín í erlendri mynt verður þeim það heimilt.

Tilkynninguna má lesa í heild sinni hér fyrir neðan.