Frumtak keypti 70% í Median

Frumtak hefur keypt u.þ.b. 70% hlutafjár í Median - Rafræn miðlun hf. Seljandur hlutarins eru Drómi hf. og Miðengi ehf., eignarhaldsfélag Íslandsbanka.

Fyrirtækjaráðgjöf Íslandsbanka hefur annast ráðgjöf og söluferli á Median - Rafrænni miðlun síðan í maí á þessu ári. Um opið söluferli var að ræða þar sem öllum áhugasömum fjárfestum sem uppfylltu ákveðin skilyrði var boðið að taka þátt. Markmið Frumtaks með kaupunum er að samnýta tækni og markaðsstarf fyrirtækjanna Median og HandPoint, en bæði fyrirtækin starfa á sviði rafrænnar greiðslumiðlunar.

Median - Rafræn miðlun hf. er hugbúnaðar- og þjónustufyrirtæki sem sérhæfir sig í að skapa fyrirtækjum lausnir á sviði færslumiðlunar og rafrænna viðskipta. Í fréttatilkynningu frá Íslandsbanka kemur fram að lausnir þeirra séu notaðar af hundruðum fyrirtækja, bæði innanlands og erlendis, beint og í gegnum samstarfsaðila.

„Median er ákjósanlegur fjárfestingakostur fyrir Frumtak" sagði dr. Eggert Claessen, framkvæmdastjóri Frumtaks.