Gagnaveitan greiði vexti af láni frá OR

Gagnaveitu Reykjavíkur ber að greiða eðlilega vexti af láni Orkuveitu Reykjavíkur til fyrirtækisins samkvæmt ákvörðun Póst- og fjarskiptastofnunar sem birt var í gær.

Stofnunin átelur Gagnaveituna fyrir að fara ekki að skýrum fyrirmælum hennar. Í ákvörðun stofnunarinnar segir að til greina hefði komið að beita Gagnaveituna stjórnvaldssekt fyrir þessa háttsemi hefði stofnunin haft lagaheimild til þess.

Lán Orkuveitunnar til Gagnaveitunnar er til komið vegna færslu eigna til Gagnaveitunnar við aðskilnað fyrirtækjanna, sem Póst- og fjarskiptastofnun mælti fyrir um. Stofnunin yfirfór samning um aðskilnað fyrirtækjanna, þar sem Orkuveitan lánaði Gagnaveitunni á móti eignum sem runnu inn í Gagnaveituna. Í upprunalegum samningi var kveðið á um vexti, en Póst- og fjarskiptastofnun taldi að stytta þyrfti lánstímann til að lánið teldist ekki niðurgreiðsla Orkuveitunnar á fjarskiptastarfsemi Gagnaveitunnar.

Breyta þurfti lánasamningi fyrirtækjanna verulega, og inn í breyttan samning slæddist ákvæði um að lánið til Gagnaveitunnar skyldi vera vaxtalaust á lánstímanum, að því er fram kemur í ákvörðun Póst- og fjarskiptastofnunar.

Í niðurstöðum stofnunarinnar segir að þarna hafi verið gengið þvert á skýr fyrirmæli hennar. Með þessu hafi einnig verið brotið gegn ákvæði laga um fjarskipti þar sem lagt er bann við því að samkeppnisrekstur fjarskiptafyrirtækja sé niðurgreiddur af einkaleyfisstarfsemi eða verndaðri starfsemi.

Í ákvörðun Póst- og fjarskiptastofnunar segir að líta verði þessa hegðun stjórnenda fyrirtækisins alvarlegum augum. Stjórnendurnir geti ekki borið fyrir sig misskilning eða andvaraleysi gagnvart skýrum fyrirmælum stofnunarinnar.

Í ákvörðun Póst- og fjarskiptastofnunar kemur fram að Gagnaveitan hafi þegar brugðist við með því að greiða áfallna vexti af láninu. Þar er áréttað að áfram skuli greiða vexti út lánstímann.

brjann@frettabladid.is