Viðsnúningur upp á rúma 14 milljarða hjá Landsneti

Hagnaður Landsnets hf. samkvæmt rekstrarreikningi nam 1.471 milljónum kr. fyrir árið 2009 samanborið við tap að fjárhæð tæpa 12,8 milljarða kr. á árinu 2008. Betri afkoma stafar aðallega af mun minna gengistapi en á fyrra ári auk þess sem tekjur af raforkuflutningi hafa aukist.

Í tilkynningu um málið segir að rekstrarhagnaður fyrir fjármagnsliði og afskriftir (EBITDA) nam 9,3 milljörðum kr. samanborið 7 milljarða kr. á fyrra ári.

Eiginfjárhlutfall í árslok var 11,3% samanborið við 10,5% í lok fyrra árs. Eigið fé í árslok nam 8,3 milljarða kr. samanborið við tæpa 7,3 milljarða kr. í lok árs 2008.

Heildareignir félagsins í árslok námu 73,7 milljörðum kr. samanborið við 69,4 milljarða kr. Í lok fyrra árs. Heildarskuldir námu rúmum 65,3 milljörðum kr. samanborið við rúma 62 milljarða kr. Í lok fyrra árs.

Lausafjárstaða félagsins er sterk, í árslok nam handbært fé 5,9 milljörðum kr. Handbært fé frá rekstri nam 7,5 milljarða kr. árið 2009 samanborið við tæpa 5,8 milljarða kr. árið 2008.

Rekstrarhæfi félagsins er mjög gott. Samkvæmt fjárhagsáætlun fyrir árið 2010 mun handbært fé frá rekstri standa undir fjárfestingum og afborgunum, auk þess sem gert er ráð fyrir að skuldir muni lækka.