Hagar keyptu eigin bréf af stjórnendum fyrir milljarð

Hagar keyptu eigin bréf af helstu stjórnendum félagsins fyrir rúman milljarð. Þá vildu helstu lífeyrissjóðir landsins ekki fjárfesta í Högum með Jóhannes Jónsson innanborðs.

Viðskiptablaðið greinir frá því í dag að Hagar hafi keypt eigin bréf af helstu stjórnendum sínum fyrir rúman milljarð króna frá miðju ári 2008 og fram í október á síðasta ári, sem var um það leyti sem Arion banki var að taka verslanakeðjuna yfir. Þetta voru bréf í eigu Finns Árnasonar, forstjóra Haga, Jóhönnu Waagfjörð, fjármálastjóra Haga og Guðmundar Marteinssonar, framkvæmdastjóra Bónuss.

Félagið keypti bréf stjórnendanna í þremur atrennum, síðast í október 2009, en hinn 19. október sama ár var félagið tekið yfir af Kaupþingi, nú Arion banka. Miðað við síðustu viðskipti þá er virði Haga 22,6 milljarðar króna.

Iða Brá Benediktsdóttir, talsmaður Arion banka, sagði í svari við fyrirspurn fréttastofu nú í morgun að kaupin á hlutabréfunum hefðu alfarið verið ákveðin og átt sér stað áður en bankinn tók Haga yfir, bankinn hafi því enga aðkomu átt að viðskiptunum.

Í fréttaskýringu Viðskiptablaðsins í dag er jafnframt greint frá því að helstu lífeyrissjóðir landsins hafi neitað að fjárfesta í Högum á meðan Jóhannes Jónsson kaupmaður var stjórnarformaður fyrirtækisins, en honum var tryggður forkaupsréttur á hlutum í félaginu. Viðskiptablaðið greinir frá því að þessi skoðun hafi komið mjög skýrt fram á kynningarfundum sem fyrirtækjaráðgjöf Arion banka hélt fyrir lífeyrissjóðina fyrr á þessu ári. Blaðið greinir frá því að ástæða þess að sjóðirnir vildu ekki vinna með Jóhannesi sé sú að þeir töpuðu gríðarlegum fjárhæðum á því að kaupa skuldabréf í fyrirtækjum sem tengdust Jóhannesi og Jóni Ásgeiri syni hans.

Iða Brá Benediktsdóttir, talsmaður Arion banka, staðfesti umfjöllun Viðskiptablaðsins við fréttastofu í megindráttum. Í skriflegu svari við fyrirspurn fréttastofu segir hún: „Það kom upp á fundum með aðilum sem líklegir eru til bjóða í Haga þegar félagið fer í söluferli að sumir þeirra litu aðkomu stjórnarformannsins neikvæðum augum. Eins og áður hefur komið fram þá lýsti Jóhannes því yfir opinberlega að hann hygðist freista þess að kaupa félagið. Við það var ljóst að það samrýmdist ekki lengur hagsmunum bankans og áformum um opið söluferli að hann yrði þar áfram innanborðs."

Fréttastofa náði tali af Jóhannesi Jónssyni í morgun en hann sagðist ekki hafa séð umfjöllun Viðskiptablaðsins og vildi ekkert tjá sig um málið.

Jón Ásgeir Jóhannesson er kvæntur Ingibjörgu Pálmadóttur sem er stærsti hluthafinn í 365 miðlum sem eiga og reka fréttastofu Stöðvar 2 og Bylgjunnar.