Scott Belsky í Salnum á morgun

Metsöluhöfundurinn Scott Belsky heldur morgunverðarfund í Salnum á morgun klukkan 8:30. Belsky er sérfræðingur á sviði framkvæmda og framleiðni, og að hans sögn er hæfileikinn til að fylgja skapandi verkefnum eftir til enda engum meðfæddur. „Að framkvæma hugmyndir er kunnátta sem verður að þróa með skipulagi og með stuðningi samstarfsmanna og samfélags hvers og eins," segir í tilkynningu.

Scott skrifaði bókina Frá hugmynd til veruleika (e. Making ideas happen) sem kom út í Bandaríkjunum í sumar og varð metsölubók. Bókin kemur út á íslensku 19. október nk.

Belsky er stofnandi og forstjóri Behance, fyrirtækis sem vinnur að eflingu og skipulagi hins skapandi heims (sjá www.behance.com.)

Hann hefur rannsakað venjur og vinnubrögð óvenju afkastamikilla einstaklinga og hópa í ýmsum atvinnugreinum. Á þessum lifandi morgunverðarfundi tekur hann saman helstu grundvallaratriði og aðferðir sem þeir eiga sameiginlegt og kynnir til sögunnar kerfisbundna nálgun að skapandi skipulagi og framleiðni.