Össur hf. að baki 80% af hlutabréfaveltunni í Kauphöllinni

Heildarviðskipti með hlutabréf í Kauphöllinni í októbermánuði námu 2.775 milljónum eða 132 milljónum á dag. Þessu til samanburðar var veltan með hlutabréf í september 2.326 milljónir eða 106 milljónir á dag.

Mest voru viðskipti með bréf Össurar eða 2.213 milljónir, Marel eða 498 milljónir og Atlantic Petroleum eða 37 milljónir. Þetta þýðir að bréf Össurar stóðu fyrir rúmum 80% af veltunni.

Þetta kemur fram í tilkynningu. Þar segir að úrvalsvísitalan (OMXI6) hækkaði um 3,14 % milli mánaða og stendur nú í 949 stigum. Af atvinnugreinavísitölum hækkaði vísitala orkuvinnslu (IX10PI) mest eða 11,4%.

Á Aðalmarkaði Kauphallarinnar var Arion banki með mestu hlutdeildina 46,8% (18,2% á árinu), H.F. Verðbréf með 25,4% (8,4% á árinu) og Virðing með 8,9% (3,5% á árinu).

Heildarviðskipti með skuldabréf námu 247 milljörðum í síðasta mánuði sem samsvarar 11,8 milljarða veltu á dag samanborið við 22,1 milljarða veltu á dag í septembermánuði en það er veltumesti mánuðurinn á þessu ári.

Í októbermánuði var MP Banki með mestu hlutdeildina á skuldabréfamarkaðinum eða 27,1% (30,1% á árinu), Íslandsbanki með 23,1% (22,3% á árinu) og Landsbankinn með 15,5% (19,7% á árinu).