Kauphöllin íhugar að kæra Bakkavör til FME

Komi til þess að Bakkavör Group hf. verði breytt úr hlutafélagi í einkahlutafélag, án þess að hlutabréf þess hafi áður verið tekin úr viðskiptum í kauphöll samkvæmt þeim lögum sem um það gilda, lítur Kauphöllin svo á að um sé að ræða brot á samningi félagsins við Kauphöllina.

Kauphöllin mun tilkynna Fjármálaeftirlitinu (FME) um slíkt brot í samræmi við þá lagaskyldu sem á henni hvílir í þeim efnum samkvæmt lögum um kauphallir.

Þetta kemur fram í tilkynningu um málið. Þar segir að þann 5. mars. sl. birti Bakkavör Group hf. opinberlega tilkynningu um hluthafafund félagsins sem haldinn verður 26. mars 2010. Í 2. lið dagskrár hluthafafundarins er gerð „tillaga um að breyta félaginu í einkahlutafélag í samræmi við ákvæði... laga... um hlutafélög og afskrá félagið í kjölfarið úr Kauphöllinni

Um félög sem fengið hafa hlutabréf sín tekin til viðskipta í kauphöll gilda sérstakar reglur sem leggja slíkum félögum á herðar ýmsar skyldur umfram önnur félög. Þær skyldur sem hér um ræðir eru samkvæmt samningi Kauphallarinnar og félagsins, reglum Kauphallarinnar sem félagið hefur undirgengist, lögum um kauphallir, sem og öðrum lögum og reglum á sviði fjármálamarkaðar. Þau lög sem hér er vitnað til eru sérlög sem ganga framar almennum reglum laga um hlutafélög.

Þegar félag er orðið einkahlutafélag eru hlutir þess ekki lengur tækir til viðskipta í kauphöll. Því telur Kauphölllin að breyting Bakkavarar Group hf. úr hlutafélagi í einkahlutafélag geti ekki átt sér stað fyrr en að lokinni töku hlutabréfa félagsins úr viðskiptum í kauphöll.

Samkvæmt lögum um kauphallir er það Kauphöllin sem ákveður hvort og þá hvenær hlutabréf útgefanda verða tekin úr viðskiptum, sbr. einnig grein 1.1.27 í reglum Kauphallarinar fyrir útgefendur fjármálagerninga.