Greining býst við auknu atvinnuleysi á næstu mánuðum

Ekki er við öðru að búast en að atvinnuleysi samkvæmt skráningu á vinnumiðlunum haldi áfram að aukast á næstu mánuðum, þá einna helst vegna árstíðarsveiflu. Yfirleitt versnar atvinnuástandið með haustinu en á frá september til desember í fyrra jókst það úr 7,2% í 8,2% og jókst svo enn frekar í janúar þegar það fór upp í 8,8%.

Þetta kemur fram í Morgunkorni greiningar Íslandsbanka. Þar segir að samkvæmt nýrri spá Alþjóðagjaldeyrissjóðsins sem var birt fyrr í vikunni reiknar sjóðurinn með að atvinnuleysi komi til með að verða 8,6% í ár en fari svo niður í 8,4% á næsta ári.

„Að okkar mati gætir of mikillar svartsýni í spá þeirra enda yrði atvinnuleysi þá að vera að meðaltali 9% á mánuði þessa fjóra síðustu mánuði ársins ef hún ætti að rætast. Engu að síður má gera ráð fyrir að atvinnuleysi komi til með að hækka nokkuð hratt á næstu mánuðum og nái hámarki á fyrstu mánuðum næsta árs," segir í Morgunkorninu.

Hópuppsagnir nú í september eru töluvert færri en á sama tíma í fyrra þegar alls 87 manns var sagt upp störfum í slíkum uppsögnum, og er þessi þróun í takti við það sem verið hefur á árinu.

Þannig hefur verið heldur minna um hópuppsagnir framan af þessu ári en í fyrra, en alls hafa Vinnumálastofnun borist 22 tilkynningar um hópuppsagnir á árinu þar sem sagt hefur verið upp 515 manns. Á sama tímabili í fyrra höfðu borist alls 43 tilkynningar sem náðu til 1.454 starfsmanna.

„Ekki hægt að slá því föstu að þessari uppsagnahrinu sé lokið. Má hér nefna að sú hætta er fyrir hendi að seinkunin sem hefur orðið á endurskipulagningu skulda margra fyrirtækja, og hefur þá jafnvel tímabundið komið í veg fyrir að mörg þeirra hafi farið í þrot án þess að staða þeirra hafi í raun breyst til hins betra, hafi einnig tímabundið komið í veg fyrir að mörg þeirra hafa ráðist í frekari uppsagnir," segir í Morgunkorninu.