Þessir skiluðu inn tilboðum í Haga

Ljóst er að hart verður barist um smásölurisann Haga. Framtakssjóður Íslands, KEA, Stefnir, Auður Capital, bandarískir eigendur Eimskips og Saga Fjárfestingarbanki eru á meðal þeirra sem gert hafa tilboð í félagið. Fyrri eigendur hvorki neita því né játa að vera í hópi áhugasamra.

Arion banki auglýsti í október eftir tilboðum í Haga. Tíu óskuldbindandi tilboð bárust bæði frá innlendum og erlendum aðilum. Markmiðið hjá Arion banka er að fá einhvern sterkan fjárfesti til að veita fyrirtækinu forystu til lengri tíma, en markmiðið er dreift eignarhald og skráning fyrirtækisins í Kauphöllina.

Samkvæmt heimildum fréttastofu skiluðu eftirtaldir aðilar inn óskuldbindandi tilboðum: Kea, Auður Capital, Stefnir, eignastýringarfélag Arion banka, félag sem tengist bandaríska fyrirtækinu Yucaipa sem á 32 prósenta hlut í Eimskip, Framtakssjóður Íslands og Saga Fjárfestingarbanki fyrir hönd ótilgreindra fjárfesta.

Þetta eru þau tilboð sem Arion banki er að íhuga alvarlega, samkvæmt heimildum fréttastofu Það sem er sérstakt hér er auðvitað þátttaka Stefnis, þar sem félagið er dótturfélag Arion banka. Þá er talið líklegt að félag tengt fyrri eigendum Haga, þ.e Jóhannesi Jónssyni, Jóni Ásgeiri og fjölskyldu, hafi skilað inn tilboði en það fékkst ekki staðfest. Fréttastofa spurðist margítrekað fyrir um þetta hjá fulltrúum fjölskyldunnar, en þessu var hvorki neitað né játað.

Eins og sést af þessari upptalningu eru þetta sjö sundurgreindir aðilar, en önnur nöfn hafa ekki fengist upp gefin. Eins og Arion banki hefur greint frá bárust í heildina tíu óskuldbindandi tilboð í fyrirtækið.



Tilboðin mun lægri en menn höfðu gert sér vonir um

Arion banki gerir ekki athugasemdir við tilboðsgjafanna og vill ekki tjá sig um þá, en efni fréttarinnar var borið undir fulltrúa bankans. Í skriflegu svari frá Arion banka segir að bankinn muni ekki veita upplýsingar að svo stöddu. Söluferlið muni halda áfram og á næstu dögum hefjist formlegar viðræður við vænlega kaupendur. Samkvæmt upplýsingum fréttastofu voru tilboðin sem bárust umtalsvert lægri en stjórnendur Arion banka höfðu gert sér vonir um. Bankinn vill þó ekki tjá sig um þetta atriði.

Finnbogi Jónsson, framkvæmdastjóri Framtakssjóðsins, sem gerði tilboð í 25 prósenta hlut í Högum, sagði í samtali við fréttastofu í dag að sjóðurinn hefði ekki áhuga að kaupa stærri hlut, fær svo að tilboði sjóðsins yrði tekið. Samkvæmt verðmati sem unnið var á Högum gæti fjórðungshlutur í fyrirtækinu verið tveggja til sex milljarða króna virði. Stefnt að því að ljúka sölu á fyrirtækinu um næstu áramót.