Hollur matur í Happi

Þrátt fyrir erfiða tíma í atvinnu- og efnahagslífi eru enn vaxtarmöguleikar fyrir nýjar og góðar hugmyndir. Dæmi um þetta er Happ ehf. sem hefur vaxið fiskur um hrygg frá stofnun þess fyrir um tveimur árum.

Happ er orðið myndarlegt fyrirtæki þar sem um tuttugu manns vinna í framleiðslu fyrir hundruð viðskiptavina, meðal annars í veisluþjónustu og skólamat, og fyrr í haust opnaði Happ veitingastað í Höfðatorgi.

Starfsemin hófst með því að Unnur Guðrún Pálsdóttir, stofnandi og annar eigenda Happs, bauð upp á þjónustu þar sem fólk gat keypt heils dags skammt af hollum mat. „Ég hafði aldrei staðið í rekstri áður, en hafði starfað við heilsurækt. Þar fann ég að fólki fannst vanta svona vörur á markaðinn og ákvað að leysa málið sjálf,“ segir Unnur. Hún rekur nú fyrirtækið ásamt Þórdísi Jónu Sigurðardóttur.

Umsvifin hafa aukist jafnt og þétt. „Það er mjög gaman að á þessum erfiðu tímum höfum við stöðugt verið að fjölga starfsfólki.“ Lagt er upp úr vönduðu hráefni. „Við erum bæði með grænmetisrétti og rétti með kjöti. Við stefnum að því að bjóða upp á alvöru mat, án aukaefna og þess háttar.“

„Við finnum að fólk hefur ekki bara áhuga á matnum heldur vill það læra meira. Þess vegna erum við að fara í gang með fimm daga námskeið sem fer fram í Stykkishólmi þar sem við kennum fólki á mat, hreyfingu og fleira. Svo kemur fólk til baka reynslunni ríkara.“ - þj