Daufur millibankamarkaður með gjaldeyri í nóvember

Rólegt hefur verið á millibankamarkaði með gjaldeyri það sem af er nóvembermánuði og hafa viðskipti með gjaldeyri verið afar strjál, sem er í takti við þróunina undanfarin misseri. Regluleg kaup Seðlabankans nema um 70% af veltunni á þessum markaði í mánuðinum.

Fjallað er um málið í Morgunkorni greiningar Íslandsbanka. Þar segir að þannig nemi heildarveltan á millibankamarkaði frá 1. til og með 23. nóvember 1.313 milljónum kr. og þar af eru viðskipti Seðlabanka Íslands 928 milljónum kr., eða sem jafngildir rétt rúmlega 70% af heildarveltunni. Bendir þetta til þess að veltan skreppi enn frekar saman.

Í síðasta mánuði var veltan 2.176 milljónir kr., en kaup Seðlabankans með gjaldeyri voru þá um 43% af heildarveltunni. Jafnframt er þetta mun minni velta en í nóvember í fyrra, en þá nam heildarveltan á millibankamarkaði tæpum 6,3 milljörðum kr. og var því tæplega fimmfalt meiri en veltan hefur verið þennan mánuðinn.

Þó ber augljóslega að hafa í huga að þrátt fyrir að velta á millibankamarkaði sé lítil geta gjaldeyrisviðskipti hjá hverjum viðskiptabanka fyrir sig verið talsverð. Ef þokkalegt jafnvægi er í innflæði gjaldeyris og útflæði hjá hverjum banka fyrir sig hafa þeir þannig ekki þörf fyrir að leita á millibankamarkað með kaup eða sölu gjaldeyris, að því er segir í Morgunkorninu.