Stærsta lyfjafyrirtæki í heimi stefnir Actavis

Pfizer lyfjafyrirtækið, stærsta lyfjafyrirtæki heims, hefur stefnt Actavis lyfjafyrirtækinu og vill að dómari úrskurði um að fyrirtækið markaðssetji ekki tiltekið hjartalyf þar til einkaleyfi Pfizers á framleiðslu lyfsins rennur út árið 2017.

Pfizer segir að Actavis hafi sótt um leyfi frá Matvæla- og lyfjaeftirliti Bandaríkjanna um að fá að gefa út samskonar lyf og Lipitor þrátt fyrir einkaleyfi sem Pfizer fékk á framleiðslu þess lyfs árið 1999, samkvæmt stefnunni sem gefin var út í Wilmington í Delaware í Bandaríkjunum í dag.

Lipitor er mest selda lyf í heimi en tekjur af sölu þess námu 11,4 milljörðum Bandaríkjadala í fyrra. Upphæðin samsvarar um 1370 milljörðum íslenskra króna. Þann 6. júlí síðastliðinn fékk Pfizer heimild frá framkvæmdastjórn Evrópusambandsins til að framleiða nýja tegund af lyfinu fyrir börn undir 10 ára aldri, eftir því sem fram kemur á fréttavef Bloomberg.

Actavis er í eigu Novators, félags Björgólfs Thors Björgólfssonar.