Áhugavert ef Norðurlöndin afgreiða lán án Icesavelausnar

Greining Íslandsbanka segir mjög áhugavert að sjá hvort næsta útgreiðsla Norðurlandalánanna komi samhliða þriðju endurskoðun Alþjóðagjaldeyrissjóðsins (AGS), en þrátt fyrir að Icesave málið sé ekki í höfn eru viðræður byrjaðar að nýju og samkomulag gæti verið innan seilingar. Kannski dugar það Norðurlöndunum að málið sé í vinnslu og lausn í sjónmáli?

Þetta kemur fram í Morgunkorni greiningarinnar en samkvæmt tilkynningu frá efnahags- og viðskiptaráðuneytinu sem gefin var út í gær hefur náðst samkomulag um að þriðja endurskoðun efnahagsáætlunar Íslands verði tekin fyrir í framkvæmdastjórn AGS þann 29. september næstkomandi.

„Athyglisverðasta niðurstaðan væri án efa sú ef lánafyrirgreiðslan frá Norðurlöndunum kæmi án nokkurra útskýringa og án þess að Icesave væri frágengið, þar sem að nokkuð skýrt var um þetta fjallað í skýrslu AGS frá því í apríl og kvað við nokkuð harðan tón varðandi Icesave," segir í Morgunkorninu.

Í kjölfar þriðju endurskoðuninnar verður sá hluti láns AGS sem tengist þessum áfanga greiddur út, samtals 160 milljónir dollara eða um 18 milljarðar kr. sem verður notaður til að styrkja gjaldeyrisforða Seðlabankans. Gjaldeyrisforði Seðlabankans muni því aukast um sem því nemur.

Forðinn gæti jafnvel aukist enn meira þar sem þriðji hluti láns Norðurlandanna að upphæð 444 milljónir evra, eða um 68 milljarðar kr. ætti að öllu jöfnu einnig að vera til reiðu að lokinni þriðju endurskoðun, en sá hluti lánsins veltur á framgangi Icesave málsins.

Fari svo að sá hluti lánsins verði greiddur út er ljóst að um verulega innspýtingu í gjaldeyrisforðann er að ræða, sem ætti að geta gert það að verkum að næsta skref í afnámi gjaldeyrishaftanna þokist nær.

Þegar þriðju endurskoðun er lokið eru enn eftir fjórar endurskoðanir til viðbótar á og er sú síðasta tímasett í ágúst 2011 þegar endalok efnahagsáætlunarinnar eru áformuð.