Gistinóttum fækkaði um 4% milli ára í október

Gistinætur á hótelum í október síðastliðnum voru 101.900 en voru 106.400 í sama mánuði árið 2009. Þetta er fækkun upp á rúm 4%.

Fjallað er um málið á vefsíðu Hagstofunnar. Þar segir að fækkun gistinátta í október nær eingöngu til höfuðborgarsvæðisins, en í öllum öðrum landshlutum var aukning á gistinóttum milli ára. Á höfuðborgarsvæðinu fækkaði gistinóttum um 10% milli ára, úr 106.400 í 101.900.

Gistinóttum fjölgaði hlutfallslega mest á Norðurlandi, úr 3.800 í 5.100 eða um 35% milli ára. Á Suðurnesjum voru 5.200 gistinætur í október sem 28% fjölgun frá fyrra ári. Á Austurlandi voru 2.400 gistinætur, fjölgaði um 16% og á Vestfjörðum og Vesturlandi voru 2.600 gistinætur í október sem er aukning um 15% frá fyrra ári. Á Suðurlandi voru 13.100 gistinætur í október sem er 3% aukning samanborið við október 2009.

Fækkun gistinátta á hótelum í október nær eingöngu til erlendra gesta. Gistinóttum þeirra fækkaði um 9% samanborið við október 2009 á meðan gistinóttum Íslendinga fjölgaði um 11%.

Gistinætur fyrstu tíu mánuði ársins voru 1.164.500 en voru 1.206.400 á sama tímabili árið 2009. Gistinóttum fjölgaði á Suðurnesjum, Vesturlandi og Vestfjörðum um 3%. Gistinóttum fækkar í öðrum landshlutum, Austurlandi um 6%, Norðurlandi og á höfuðborgarsvæðinu um 4% og um 2% á Suðurlandi.

Fyrstu tíu mánuði ársins hefur gistinóttum Íslendinga fækkað um 4% og gistinóttum erlendra gesta um 3% miðað við sama tímabil árið 2009.