Heyrði um niðurskurð í Reykjanesbæ í fjölmiðlum

Oddviti Samfylkingarinnar í Reykjanesbæ segist ekki hafa séð tillögur Sjálfstæðismanna um niðurskurð heldur aðeins heyrt af þeim í gegnum fjölmiðla. Aðgerðir séu þó óhjákvæmilegar því bæjarfélagið tapi um fjórum milljónum daglega. Hann segir að Reykjanesbær sé að fjalla fram af bjargbrún.

Í Morgunblaðinu í gær var greint frá því að stjórnendur Reykjanesbæjar eru að undirbúa niðurskurð kostnaðar og hagræðingu.

Árni Sigfússon bæjarstjóri greind þar frá því að stefnt sé að því að minnka útgjöld bæjarins um 450 milljónir, en í fyrra var einnig ráðist í niðurskurð.

Friðjón Einarsson, oddviti Samfylkingarinnar í Reykjanesbæ, segist ekki hafa séð þessar tillögur og er ósáttur við að þurfa að heyra af þeim í gegnum fjölmiðla.

"Ég hef ekki fengið að sjá neina af þessum tillögum frá Sjálfstæðismönnum þrátt fyrir að ég sitji í bæjarráði og bæjarstjórn. Við höfum lengi bent á að við verðum að skera niður enda tapar bæjarfélagið daglega um fjórum milljónum. Við höfum kallað eftir samvinnu við sjálfstæðismenn en því hefur ekki verið sinnt. Því kemur mér á óvart að þurfa að heyra af svona í fjölmiðlum," segir Friðjón.

Hann segir mönnum hafi verið lengi ljóst hvert stefndi í rekstri bæjarfélgsins. "Ég get ekki betur séð en nú séum við að falla fram af bjargbrúninni," segir hann.