Kannaði sérstaklega fjórðung viðskipta Háskóla Íslands

Ríkisendurskoðun ákvað að kanna sérstaklega, í úrtaki, 21 af 83 viðskiptum sem Háskóli Íslands átti við birgja sína á tímabilinu janúar til október á síðasta ári. Þetta kemur fram í nýrri skýrslu Ríkisendurskoðunar um viðskipti ríkisstofnana við 800 birgja.

Í skýrslunni segir að viðskipti þessara 83 birgja, sem voru í úrtakinu, námu samtals samtals 221 milljónum kr. á þessu tímabili í fyrra. Viðskipti við sömu birgja námu alls 203,4 milljón kr. á árunum 2007 og 2008. Ríkisendurskoðun taldi ástæðu til að kanna 21 viðskipti sérstaklega.

Viðskiptin 21 eru síðan talin upp í skýrslunni en þar segir að enginn formlegur verðsamanburður var gerður fyrir eftirfarandi kaup, utan þau síðustu. Í því tilfelli og því næstsíðasta er útboðsskylda algjörlega skýr að mati Ríkisendurskoðunar.

Tilfellin tvö eru annarsvegar að skólinn keypti fisk til rannsókna af útgerðarfélaginu Glófaxa ehf. fyrir 14,3 milljónir kr. á tímabilinu. Skólinn hefur ekki skýrt hvað réði vali á birgja.

Hitt tilfellið er að hreingerningaþjónustan Axel ehf. fékk greiddar samtals 54,4 milljónir kr. á tímabilinu fyrir hreingerningarþjónustu. Skólinn óskaði eftir tilboðum frá þremur birgjum og bárust tilboð frá þeim öllum. Hreingerningarþjónusta Axels ehf. átti lægsta tilboðið. Að mati Ríkisendurskoðunar er umfang verksins svo mikið að slík verðkönnun var ófullnægjandi. Verkið hefði átt að bjóða út. Skólinn hefur ákveðið að bjóða þjónustuna út í samstarfi við Ríkiskaup þegar gildandi samningar renna út.

Þá kemur fram að skólinn keypti gistingu í Vestmannaeyjum af fyrirtækinu fyrir samtals 618 þúsund kr. á tímabilinu. Ríkisendurskoðun hefur ekki fengið skýringar á því hvað réði vali.

Hvað afganginn af viðskiptum skólans við 21 birgja sem athugasemdir voru gerðar við segir í skýrslunni að val á þeim hafi einkum ráðist á þekkingu á störfum viðkomandi eða á reynslu skólans frá fyrri samskiptum.