Vill rifta meintum gjafagjörningi upp á hálfan milljarð

Sigurbjörn Þorbergsson, skiptastjóri Þreks sem áður rak World Class, mun á næstu dögum höfða mál til að rifta meintum gjafagjörningi. Fyrri eigendur greiddu 25 milljónir fyrir eignir sem skiptastjórinn metur á 500- 700 milljónir.

Þetta kemur fram á vefsíðu RÚV. Þar segir að eignarhaldsfélagið Þrek rak fjölda líkamsræktarstöðva á höfuðborgarsvæðinu undir merkjum World Class en fór jafnframt í útrás til Danmerkur. Félagið var úrskurðað gjaldþrota fyrir rúmu ári. Kröfur í búið nema 2,2 milljörðum króna.

Sama dag og Þrek fór í þrot keypti annað félag helstu eignir úr félaginu. Sömu stjórnendur eru í báðum félögum, ýmist í stjórn eða framkvæmdastjórn.

Fyrir þetta greiddu eigendurnir fyrrverandi fimm milljónir króna í reiðufé og yfirtóku skuldbindingar gagnvart starfsmönnum fyrir 20 milljónir. Kaupendurnir halda því fram að reksturinn hafi verið verðlaus.