Culiacan flytur í stærra húsnæði

„Fólk veltir því meira fyrir sér hvað það borðar. Það kýs nú frekar hollari mat,“ segir Sólveig Guðmundsdóttir, framkvæmdastjóri veitingastaðarins Culiacan.

Veitingastaðurinn, sem býður upp á heilsusamlega mexíkóska rétti, flutti í byrjun mánaðar úr Faxafeninu þar sem hann hefur verið í rúm sjö ár í stærra húsnæði við Suðurlandsbraut. „Það var orðið ansi þröngt um okkur,“ segir Sólveig og bætir við að veitingahúsarekstur almennt tekið við sér eftir dýfu haustið 2008 og í fyrra, ekki síst hjá þeim sem bjóði upp á heilnæmari mat en aðrir. „Fólk spáir orðið mikið í matinn, úr hverju hann er og hversu ferskur,“ segir hún.

Sólveig, sem er iðnhönnuður að mennt, innréttaði eldra húsnæði Culiacan. Það sama á við um nýja staðinn. - jab