Danske bank: Stjórnmálamenn brugðust en ekki markaðurinn

Þetta kemur fram á vefsíðunni norden.org en þar er spurt, hverjar voru ástæður efnahagskreppunnar á Íslandi haustið 2008 og hvernig eiga Íslendingar að bregðast við núna? Leitað var svara við þessum spurningum á fundi stjórnmálamanna og sérfræðinga í Kristjánsborgarhöll á 17. júní. Sama dag samþykkti Evrópusambandið að hefja viðræður um inngöngu Íslendinga í ESB.

„Ég tel að viðbrögð fyrri ríkisstjórnar hafi gert ástandið illt verra fyrir Ísland", sagði Diana Wallis, sem tók þátt í umræðufundinum um kreppuna á Íslandi í danska þinginu.

Wallis er varaforseti Evrópuþingsins og félagi í frjálslynda demókrataflokknum í Bretlandi, sem nú er á aðild að bresku stjórninni ásamt Íhaldsflokknum.

„Ísland getur nú verið komið í aðstöðu til að leggja öðrum lið", sagði Wallis, og vísaði þá til þess að Íslendingar eru fyrsta þjóðin í Evrópu sem verður fyrir þeim dramatísku áhrifum sem fjármálakreppan hafði í för með sér, og þess vegna getur reynsla þeirra orðið mikils virði fyrir aðrar Evrópuþjóðir sem lenda í kröggum.

Diana Wallis lagði áherslu á að Íslendingar hefðu margt fram að færa á vettvangi Evrópusambandsins á sama hátt og ESB gæti gert mikið fyrir Ísland, en aðild að ESB og Evrusvæðinu myndi ekki tryggja Íslandi neina töfralækningu. Breytingar yrðu að koma innan frá.

Umræðufundurinn í danska þinginu var haldinn á þjóðhátíðardegi Íslands þegar ESB samþykkti að hefja aðildarviðræður við Íslendinga. Tilkynningin frá ESB kom eftir að umræðufundinum lauk.

„Það voru stjórnmálamennirnir sem brugðust, ekki markaðurinn", sagði Lars Christensen, yfirmaður greiningardeildar Danske bank, þegar hann skýrði bankahrunið á Íslandi haustið 2008.

„Allir vissu að eitthvað var að í íslensku efnahagslífi, en enginn sagði neitt. Þetta var sígild loftbóla sem hlaut að springa. Stjórnmálamenn höguðu sér eins og klappstýrur fyrir bankana", sagði Christensen, sem varaði við því þegar á árinu 2007 að í óefni væri komið með íslenska hagkerfið. Hrunið kom honum ekki á óvart, að því er segir á norden.org.