Töluverður kippur í sölu fasteigna í borginni

Fjöldi þinglýstra kaupsamninga á höfuðborgarsvæðinu 24. september til og með 30. september 2010 var 85. Þetta er töluverð uppsveifla í fjölda samninga því þeir hafa verið 63 talsins að meðaltali undanfarna þrjá mánuði.

Greint er frá þessu á vefsíðu Þjóðskrár Íslands. Þar segir að af þessum 85 samningum voru 70 samningar um eignir í fjölbýli, 11 samningar um sérbýli og 4 samningar um annars konar eignir en íbúðarhúsnæði. Heildarveltan var 2.357 milljónir króna og meðalupphæð á samning 27,7 milljónir króna.

Heildarveltan er umtalsvert meiri í vikunni en á undanförnum þremur mánuðum. Hún hefur verið 1,8 milljarður kr. að meðaltali á viku þann tíma.

Á sama tíma var 1 kaupsamningi þinglýst á Suðurnesjum. Hann var um annars konar eign en íbúðarhúsnæði. Upphæð samnings var 5 milljónir króna.

Á sama tíma var 3 kaupsamningum þinglýst á Akureyri. Þar af var 1 samningur um eignir í fjölbýli og 2 samningar um sérbýli. Heildarveltan var 55 milljónir króna og meðalupphæð á samning 18,3 milljónir króna.

Á sama tíma var 4 kaupsamningum þinglýst á Árborgarsvæðinu. Þar af var 1 samningur um eignir í fjölbýli, 2 samningar um sérbýli og 1 samningur um annars konar eignir en íbúðarhúsnæði. Heildarveltan var 58 milljónir króna og meðalupphæð á samning 14,5 milljónir króna.