Bankavextir freista erlendra fjárfesta

Rúmur helmingur af allri erlendri nýfjárfestingu sem komið hefur inn í landið frá því slakað var á gjaldeyrishöftum í lok október í fyrra hefur farið inn á innlánsreikninga í bönkunum. Erlendir aðilar hafa fjárfest hér á landi fyrir 15,9 milljarða króna frá 1. nóvember í fyrra til 8. apríl á þessu ári, samkvæmt gögnum frá Seðlabankanum.

Þetta skref í afnámi gjaldeyrishaftanna fól í sér heimild til innstreymis erlends gjaldeyris til nýfjárfestinga og útstreymis gjaldeyris sem kann að leiða af því í framtíðinni. Fengu þá fjárfestar heimild án takmarkana til þess að skipta aftur í erlendan gjaldeyri söluandvirði eigna sem þeir fjárfesta í, ásamt fjármagnstekjum af þeim.

Af heildarinnflæði erlends fjármagns frá í nóvember fór rúmur 8,1 milljarður króna inn á innlánsreikninga en tæpir 6,2 í fjárfestingar í atvinnurekstri. Tæpir 1,6 milljarðar króna fóru í viðskipti með skráða fjármálagerninga, þar á meðal hlutabréf og skuldabréf, og í fasteignakaup. Á sama tíma hefur útflæði sem leyft var á sama grunni aðeins verið 31 milljón króna. Innstreymið á erlendu fjármagni var mest í nóvember og desember, 4,5 milljarðar króna hvorn mánuð, en úr því dró eftir því sem á leið, líkt og sést á töflunni hér til hliðar.

„Þetta eru ekki háar tölur, þær eru mun lægri en við hefðum viljað sjá,“ segir Gylfi Magnússon, efnahags- og viðskiptaráðherra. Hann bendir á að fjárfestingar erlendra aðila hér sé einn af óvissuþáttunum sem nefndir eru í skýrslu starfshóps Alþjóðagjaldeyrissjóðsins (AGS) vegna annarrar endurskoðunar efnahagsáætlunar stjórnvalda og sjóðsins.

Gylfi segir mikilvægt að auka fjárfestingar hér, hvort heldur er innlendra og erlendra aðila. Það skipti máli bæði fyrir hagvöxt og geti dregið úr atvinnuleysi. „Við verðum að gera okkar besta til að skapa umhverfi sem hvetur til fjárfestinga,“ segir Gylfi.

Tryggvi Tryggvason, framkvæmdastjóri eignaumsýslu og ráðgjafar hjá Saga Capital fjárfestingarbanka, segir innflæðið meira en hann hafi búist við. Hann rifjar upp að margir hafi verið efins um að þessi fyrstu skref í afnámi gjaldeyrishafta myndu skila miklu. Tryggvi segir háa bankavexti freista fjárfesta en telur ekki útilokað að eitthvað af fénu bíði þess að fara í fjárfestingar. „Ég reikna með að þeir peningar sem liggja í innlánum og ríkisskuldabréfum muni að einhverju leyti rata út í atvinnulífið eftir því sem vextir lækka,“ segir hann.