Segir verðbólguhorfur að mestu óbreyttar

Greining Íslandsbanka segir að verðbólgumæling Hagstofunnar í morgun breyti ekki í stórum dráttum sýn greiningarinnar á verðbólguþróun næstu mánuðina. Nokkur hækkun mun verða á vísitölunni fram til áramóta vegna frekari áhrifa af hækkun veitufyrirtækja og verðhækkunum á landbúnaðarhrávörum erlendis.

Fjallað er um málið í Morgunkorni greiningarinnar. Þar segir að hinsvegar mun verðbólga halda áfram að hjaðna jafnt og þétt, og mælingin í morgun ætti ekki að hafa áhrif á vaxtaákvörðun Seðlabankans í næstu viku, sér í lagi þegar hún er sett í samhengi við septembermælinguna, þegar vísitala neysluverðs stóð óbreytt milli mánaða.

„Þótt verðbólga hafi reynst meiri en vænst var í október virðast verðbólguhorfur í stórum dráttum óbreyttar. Samkvæmt nýbirtum tölum Hagstofunnar hækkaði vísitala neysluverðs (VNV) um 0,74% á milli september og október. Verðbólga mælist nú 3,3% en var 3,7% í september. Fastskattaverðbólga er hins vegar 2,6% og þar með komin að verðbólgumarkmiði Seðlabankans," segir í Morgunkorninu.

„Hækkun vísitölunnar nú er í hærri kanti miðað við spár og væntingar á markaði, en við höfðum spáð 0,4% hækkun í þetta skiptið. Munurinn virðist að verulegu leyti liggja í því að reiknuð húsaleiga, sem að mestu endurspeglar markaðsverð, hækkar um 0,9% (0,1% áhrif á VNV) meðan við höfðum gert ráð fyrir nokkurri lækkun, auk þess sem matvara, fatnaður og flugfargjöld til útlanda hækkuðu meira í verði en við gerðum ráð fyrir."