Högnuðust um rúmar 60 milljónir

Íslensk verðbréf högnuðust um 63 milljónir króna á fyrstu sex mánuðum ársins, samkvæmt tilkynningu sem send hefur verið fjölmiðlum.

Mikill vöxtur var á öllum sviðum eignastýringar, hvort sem horft er til einstaklinga eða fagfjárfesta, og fjölgaði viðskiptavinum félagsins töluvert. Eignir í stýringu hjá félaginu nema í dag 110 milljörðum króna og hafa aukist um 27 milljarða síðustu 12 mánuði.

Í tilkynningunni kemur fram að ávöxtun eignasafna hefur sömuleiðis gengið vel, til að mynda hafi Áskriftarsjóður ríkisverðbréfa hækkað um rúm 13% frá áramótum og alls um 20% síðustu 12 mánuði.

Sævar Helgason, framkvæmdastjóri Íslenskra verðbréfa, er ánægður með árangurinn. „Íslensk verðbréf eru í dag elsta eignastýringarfyrirtæki landsins og byggja á yfir 20 ára reynslu af ávöxtun fjármuna á fjármálamarkaði," segir Sævar í tilkynningu frá Íslenskum verðbréfum.