Atvinnuleysi ungs fólks mældist 21% á öðrum ársfjórðungi

Á öðrum ársfjórðungi 2010 voru að meðaltali 16.200 manns án vinnu og í atvinnuleit eða 8,7% vinnuaflsins. Atvinnuleysi mældist 9,4% hjá körlum og 8% hjá konum. Frá öðrum ársfjórðungi 2009 til annars ársfjórðungs 2010 fækkaði atvinnulausum um 500 manns.

Þetta kemur fram á vefsíðu Hagstofunnar. Þar segir að þegar litið er til aldurs var atvinnuleysi mest meðal fólks á aldrinum 16-24 ára, eða 21,3%. Atvinnuleysi er alltaf mest á meðal þess aldurshóps en er sérstaklega áberandi í öðrum ársfjórðungi. Þetta háa hlutfall í öðrum ársfjórðungi skýrist að mestu af aukinni atvinnuþátttöku námsmanna yfir sumarmánuðina.

Á fyrsta ársfjórðungi 2010 var atvinnuleysi 9,8% á höfuðborgarsvæðinu en 6,8% utan þess.

Af þeim sem voru atvinnulausir á öðrum ársfjórðungi 2010 höfðu 2.800 fengið vinnu sem hefst síðar, eða 17,4%. Til samanburðar höfðu 1.500 manns fengið vinnu, eða 9,3%, á öðrum ársfjórðungi 2009.

Á öðrum ársfjórðungi 2010 höfðu um 2.700 manns verið atvinnulausir í 12 mánuði eða lengur, eða 16,9% atvinnulausra, en voru á sama tímabili 2009 um 400 manns, eða 2,5%.