Misstum málverkin og sitjum uppi með tvöfalt söluverð bankanna

Það voru ekki bara málverkin sem fóru fyrir lítið við einkavæðingu Landsbankans, segir fjármálaráðherra. Ríkið situr uppi með meira en tvöfalt hærri skuld en það fékk fyrir söluna á helmingshlut í bankanum á sínum tíma. Tugir milljarða vegna ríkisábyrgða falla nú á ríkið.

Meirihluti fjárlaganefndar lagði það til í gær að ríkisábyrgðir frá gömlu bönkunum upp á 24 milljarða króna verði yfirteknar af ríkinu. Þessar skuldbindingar eru þannig til komnar að við einkavæðingu bankanna tóku þeir yfir skuldbindingar sem voru ríkistryggðar. Þetta eru að mestu leyti skuldabréf sem gefin voru út á markaði. Kaupendur þeirra, m.a. lífeyrissjóðir, höfðu keypt skuldabréfin með ríkisábyrgð og því var hún ekki afnumin við einkavæðinguna.

Við hrunið féllu skuldbindingarnar svo á ríkissjóð sem hefur síðan þá greitt af þeim. Í upphafi voru þessar skuldbindingar vel yfir þrjátíu milljarðar en um mitt þetta ár námu þær 28,8 milljörðum. Langstærstur hluti þeirra kom frá Landsbankanum eða 26,6 milljarðar, Kaupþing var svo með 1,8 milljarð og Glitnir með um 400 milljónir.

Samson, eignarhaldsfélag í eigu Björgólfsfeðga og þá Magnúsar Þorsteinssonar, keypti 45,8 prósenta hlut ríkisins í Landsbankanum í árslok 2002 á 11,2 milljarða króna.

Skuldin sem situr eftir hjá ríkissjóði, að frátöldum öðrum skuldum svo sem Icesave, er því rúmlega tvöfalt hærri en fékkst við einkavæðingu bankans.

Stóru hluthafarnir fengu þó sitt á meðan allt lék í lyndi en á meðan feðgarnir voru kjölfestufjárfestar í bankanum námu arðgreiðslur til hluthafa um 10 milljörðum, þar af fékk félag feðganna um fjóran og hálfan milljarð.

Steingrímur J. Sigfússon, fjármálaráðherra, segir söluverð bankans hafa farið fyrir lítið og meira en það.

Búið er að gera kröfur á gömlu bankanna en óvíst er hvað fæst upp í þær. Það er því ljóst að tugir milljarða falla á ríkið.