Eyjafjallajökull: Icelandair fékk 3000 símtöl á dag vegna eldgossins

Um 3000 símtöl bárust á dag í þjónustuver Icelandair fyrstu dagana eftir að gosið í Eyjafjallajökli hófst. Þetta sagði Birkir Hólm Guðnason, framkvæmdastjóri Icelandair, á Útflutningsþingi á Hilton Nordica Hotel í morgun. Gerðar hafi verið áttatíu breytingar á flugáætlunum félagsins á fjórtán dögum vegna gossins, en Icelandair setti upp sérstakan tengiflugvöll í Glasgow sem allt flug til Evrópu og Bandaríkjanna fór á tímabili um.

Birkir sagði að gert væri ráð fyrir því að tekjutap ferðamannaiðnaðarins vegna eldgossins væri um 30-50 milljarðar króna. Mikilvægt væri að ná þeim markaði til baka sem tapast hefði og snúa neikvæðri umræðu í jákvæða.

Birkir sagði annars að ferðaþjónusta hefði vaxið gríðarlega á undanförnum árum. Árið 2000 hefði um 302 þúsund ferðamenn komið til landsins en árið 2008 hefðu þeir verið um 503 þúsund. Þessi fjölgun hefði orðið þrátt fyrir að krónan hafi á þessu tímabili verið tiltölulega sterk.

Birkir sagði að það væru enn sóknarfæri í ferðamennskunni. Mikilvægt væri að fjölga ferðamönnum sem koma til landsins yfir vetrarmánuði, frá september til maí. Að þessu leyti yrði horft til reynslu Finna en þar komi fleiri ferðamenn á veturna en á sumrin.