Ráðherra leigir út skötuselskvóta fyrir 48 milljónir

Jón Bjarnason sjávarútvegsráðherra hefur ákveðið að úthluta allt að 400 lestum af skötusel á yfirstandandi fiskveiðiári með því að leigja þennan kvóta út. Leigugjaldið verður 120 kr. á kíló eða samtals 48 milljónir kr. fyrir kvótann í heild.

Greint er frá málinu á vefsíðu Fiskistofu þar sem reglugerðin um úthlutunina er birt. Þar segir að heimilt sé að úthluta á skip allt að 5 lestum í senn gegn greiðslu gjalds enda hafi viðkomandi skip leyfi til veiða í atvinnuskyni.

Fiskistofa annast úthlutun kvótans sem skal fara fram eigi síðar en 25. október 2010 á grundvelli umsókna sem borist hafa stofunni eigi síðar en 11. október 2010. Ef umsóknir um kvóta eru umfram það magn sem er til ráðstöfunar skal Fiski­stofa skipta því sem er til ráðstöfunar jafnt á milli umsækjenda.

Framsal aflaheimilda sem úthlutað er samkvæmt reglugerðinni er óheimilt.

Kvótanum í skötusel samkvæmt reglugerðinni skal haldið aðgreindum frá kvótum sem úthlutað er í skötusel á grundvelli aflahlutdeildar við aflaskráningu og skal skipstjóri við löndun afla gefa hafnarvigtarmanni upplýsingar um aflann.