Ákvörðun Jóns skiptir sköpum fyrir nokkur bæjarfélög

Ákvörðun sjávarútvegsráðherra um að auka kvóta til stuðnings minni byggðarlögum gæti skipt sköpum fyrir nokkur bæjarfélög. Á Flateyri verða uppsagnir í útgerð hugsanlega dregnar til baka.

Jón Bjarnason sjávarútvegs- og landbúnaðarráðherra undirritaði í gær tvær reglugerðir sem fela í sér aukningu á kvóta til stuðnings minni byggðarlögum á yfirstandandi fiskveiðiári. Kvótinn til minni byggðarlaga er aukinn úr 150 tonnum í 300 tonn. Breytingin er almenn og kemur öllum minni byggðarlögum sem falla undir skilyrðin til góða. Þau bæjarfélög sem gætu notið góðs af þessu eru m.a Flateyri, Vopnafjörður, Stöðvarfjörður, Ólafsvík, Árskógssandur og Grundarfjörður.

Í samræmi við þetta hefur verið ákveðið að auka heildarkvóta fiskveiðiársins um 460 þorskígildistonn og rennur sú aukning alfarið til aðgerðarinnar. Það aflamark sem úthlutað er sérstaklega til stuðnings byggðarlögum samtals 4345 tonn, en þar af 3445 tonn til minni byggðarlaga sem lent hafa í vanda vegna samdráttar í sjávarútvegi.

Teitur Björn Einarsson, stjórnarformaður útgerðarfélagsins Eyrarodda á Flateyri, segir að þessi aukning gæti orðið til þess að uppsagnir hjá fyrirtækinu verði dregnar til baka. „Það er óskandi að það verður niðurstaðan."

„Þetta er liður í því að ná fótfestu svo hægt sé að halda áfram með það verkefni sem við erum að fást við á Flateyri," segir Teitur Björn.