Yfirtöku á Exista lokið, 306 milljarða skuld breytt í hlutafé

Kröfuhafar Exista hafa yfirtekið félagið að fullu og er endurskipulagningu þess þar með lokið. Skuldum upp á 2 milljarða evra eða um 306 milljarða kr. var breytt í hlutafé í eigu kröfuhafanna. Þetta kemur fram í Financial Times í dag.

Sem kunnugt er af fréttum samþykktu kröfuhafar Exista ehf. samþykktu með 97,35% atkvæða frumvarp til nauðasamnings fyrir Exista í september. Samkvæmt nauðasamningnum fengu kröfuhafar full yfirráð yfir félaginu.

Helstu eigendur Existu voru Ágúst og Lýður Guðmundssynir, sem kenndir eru við Bakkavör. Exista var einn af stærstu hluthöfum í Kaupþingi banka sem féll í október 2008.

Í Financial Times segir að þeir Ágúst og Lýður hafi nú mátt horfa upp á að öll eign þeirra í Existu hafi verið þurrkuð út en meðal kröfuhafanna eru alþjóðlegar fjármálastofnanir og vogunarsjóðir.

Reiknað er með að kröfuhafarnir muni nú fara í að selja þær eignir sem enn eru til staðar í Exista til að lágmark tap sitt og ná aftur einhverju af fé sínu til baka. Endurskipulagningarferlinu lauk í síðustu viku og þar með var komið í veg fyrir yfirvofandi gjaldþrot Exista.