Bankarnir hömluðu nýsköpun í landinu

Katrín Júlíusdóttir iðnaðarráðherra setur Alþjóðlega athafnaviku klukkan 17 í dag. Er þetta í annað sinn sem vikan er haldin hér á landi og segir Katrín ljóst að framtakið í fyrra hafi skapað nauðsynlegt og skemmtilegt umtal um þau tækifæri sem í boði eru.

„Vikan vekur athygli á hinu jákvæða sem er að gerast og hversu ótrúlegur endurnýjunarkraftur er í atvinnulífinu," segir hún. „Við erum að sjá atvinnugreinar í dag sem eru orðnar gríðarlega stórar og mikilvægar stærðir í okkar efnahagskerfi, eins og hugverkaiðnaðurinn, tölvuleikjabransinn. Það þekktist ekki fyrir nokkrum árum."

Hátt í tvö hundruð ný fyrirtæki hafa litið dagsins ljós síðan árið 2008 í tengslum við Frumkvöðlasetur nýsköpunarmiðstöðvar. Katrín segir augljóst að efnahagshrunið hafi ýtt undir frumkvöðlastarfsemi hér á landi og veitt fólki nýja sýn á þá möguleika sem eru fyrir hendi.

„Frumkvöðlastarfsemi og hátækniiðnaður fór niður á við í aðdraganda bankahrunsins og náði ekki vexti á meðan bólan gekk yfir," segir hún. „Bankarnir sugu ekki bara orku úr samfélaginu heldur líka mannafla úr þessum greinum." Katrín segir að verði áfram lögð áhersla á stuðning við sprotafyrirtæki og nýsköpun muni verða afar fjölbreytt atvinnutækifæri í landinu í framtíðinni.

Iðnaðarráherra hefur farið fram á kynjagreiningu á bókhaldi sjóða- og stoðkerfis ráðuneytisins og býst við að fá niðurstöðurnar bráðlega.

„Ég hef óskað eftir upplýsingum um það hvernig kerfið er að nýtast kynjunum. Hvort konur sæki í sjóðina og sömuleiðis hvernig hlutfallið skiptist í úthlutunum," segir hún.

Á næstunni verður lagt fram frumvarp sem tilgreinir breytingar á endurgreiðslum vegna rannsóknarþróunar innan fyrirtækja. Ríkisstjórnin er nú að meta árangurinn á þeim lögum sem voru sett á um síðustu áramót og segir Katrín að ástæða sé til að rýmka forsendurnar nú þegar. Einnig bendir hún á að iðnaðarráðuneytið hafi varið þetta kerfi algjörlega fyrir niðurskurði.

„Það er stórt miðað við það ástand sem við stöndum frammi fyrir í dag. En við erum með áætlanir um það að þegar betur árar þá verði þetta kerfi styrkt enn frekar," segir hún. sunna@frettabladid.is