Atorka tapaði 427 milljóna máli gegn Íslandabanka

Héraðsdómur Reykjavíkur hefur komist að þeirri niðurstöðu að sýkna beri Íslandsbanka af kröfu upp á 437 milljónir kr. sem Atorka Group gerði á hendur bankanum.

Upphæðin sem hér um ræðir var inneign Atorku í peningamarkaðssjóði Glitnis áður en sá banki fór í þrot. Inneign þessi var notuð til skuldajöfnunnar hjá Glitni en Atorka skuldaði bankanum 1,7 milljarða kr. vegna þiggja samninga um gjaldmiðla og framvirk gjaldmiðlaviðskipti. Íslandsbanki er málsaðili málsins þar sem hann tók yfir innlendar skuldbindingar Glitnis eftir hrunið haustið 2008.

Fram kemur í dóminum að Atorka óskaði eftir því að framangreindri inneign yrði ráðstafað inn á tékkareikning sinn í nóvember árið 2008. Þessu hafnaði Glitnir þar sem inneigninni hafði verið ráðstafað til að greiða upp í skuld Atorku vegna gjaldmiðlasamninganna þann 10. október 2008.

Atorka taldi að þarna hefði verið um ólögmætan gjörning að ræða en Íslandsbanki vísaði til ákvæðis í gjaldmiðlasamningunum sem heimilaði bankanum þessa skuldajöfnun.

Í niðurstöðum dómsins segir að með tilkynningu 7. október 2009 lýsti skilanefnd Glitnis banka hf. yfir skuldajöfnuði milli kröfu Atorku samkvæmt fyrrgreindum samningum og kröfu bankans á grundvelli gjaldmiðlaskiptasamninganna. Kröfurnar voru á því tímamarki, og raunar mun fyrr, hæfar til að mætast og skilyrðum um gagnkvæmni fullnægt svo skuldajöfnuður gæti farið fram. Í þessu ljósi verður að telja að Atorka geti ekki átt kröfu um að Íslandsbanki greiði sér þessi innlán. Ber því að sýkna Íslandsbanka í málinu.