Ný tæki sett upp í verksmiðju Actavis í Hafnarfirði

Ný tæki til lyfjaframleiðslu hafa verið sett upp í stækkaðri lyfjaverksmiðju Actavis í Hafnarfirði. Þetta er stærsta einstaka fjárfestingin við stækkun verksmiðjunnar, en verðmæti tækjanna er yfir 200 milljónir króna.

Í tilkynningu segir að tækin sem um ræðir eru notuð til framleiðslu á kyrni, sem töflur eru gerðar úr. Annars vegar er sérhæfður tækjabúnaður til blöndunar og hins vegar búnaður sem myndar kyrnið við sérstaklega stýrðar aðstæður í loftflæði. Tækin eru keypt frá Bandaríkjunum.

"Við reiknum með að framkvæmdum ljúki fyrir áramót. Á þeim tíma verður einnig unnið að kvörðunum og gildingum á öllum tækjabúnaði sem tilheyrir þessum nýjasta hluta lyfjaverksmiðjunnar í Hafnarfirði," segir Jón Gunnar Jónsson, framkvæmdastjóri Actavis hf á Íslandi.

„Það eru gerðar gríðarlega strangar kröfur til lyfjaframleiðslu og það er mjög flókin framkvæmd að sannreyna að húsnæðið og allur búnaður uppfylli ýtrustu kröfur. Hvert einasta herbergi verður að hafa rétta loftræstingu til að verja framleiðsluna fyrir óæskilegum áhrifum."

Við stækkunina eykst framleiðslugeta Actavis á Íslandi um 50%, í um einn og hálfan milljarð taflna á ári. Núverandi verksmiðja er keyrð á vöktum allan sólarhringinn alla daga vikunnar og annar tæplega eftirspurn.

Vel hefur gengið að ráða í lausar stöður og undirbúa þannig starfsemina fyrir aukin umsvif. Starfsmenn Actavis á Íslandi eru nú orðnir fleiri en 700. Starfsfólki hefur verið bætt við í pökkun og töfluslætti, auk þess sem ráðið hefur verið í störf á gæðasviði og á fleiri sviðum í tengslum við stækkunina.

Alls er reiknað er með að starfsfólki í verksmiðjunni fjölgi um 50 á þessu ári og er þegar búið að ráða í flest þeirra starfa. Þá vinna um 40 starfsmenn nú að stækkunarframkvæmdunum, auk hönnuða sem eru að leggja lokahönd á sinn verkþátt.