Hagnaður Arion nemur 9 milljörðum

Hagnaður Arion banka á fyrstu níu mánuðum ársins nam 8,9 milljörðum króna eftir skatta. Þar af er tæpur milljarður á þriðja ársfjórðungi. Í fréttatilkynningu frá bankanum kemur fram að neikvæðra áhrifa hafi gætt á þriðja ársfjórðungi vegna gengistaps og frekari niðurfærslu lána vegna úrvinnslumála heimila og fyrirtækja. Arðsemi eiginfjár var 10,4% á ársgrundvelli. Eiginfjárhlutfall bankans styrktist um 1,7 prósentustig á þriðja ársfjórðungi og var 18,1% þann 30. september.

„Afkoma bankans á síðustu níu mánuðum er viðunandi í ljósi aðstæðna. Því er þó ekki að neita að ójöfnuður í gjaldeyrisstöðu bankans setur sitt mark á afkomuna. Það er aftur á móti jákvætt að sú ríka áhersla, sem við höfum undanfarna mánuði lagt á að styrkja enn frekar eiginfjárstöðu bankans, hefur skilað umtalsverðum árangri," segir Höskuldur Ólafsson, forstjóri bankans í tilkynningu frá bankanum.

Hann segir að sterkt eiginfjárhlutfall spegli vel þann árangur en á þriðja ársfjórðungi hafi eiginfjárhlutfall bankans styrktst um tæp 2 prósentustig, úr 16,4% í 18,1%. Þó að bankarnir hafi náð nokkrum árangri í úrlausnarmálum heimila, sé ljóst að gera þurfi enn betur, og æskilegt væri að þar kæmu fleiri stórir lánveitendur að með afgerandi hætti.