Rannsóknarstofa í hreyfivísindum samdi við Össur

Rannsóknastofa í hreyfivísindum við Námsbraut í sjúkraþjálfun og Össur hf. hafa undirritað samning þess efnis að Rannsóknastofa í hreyfivísindum og Össur muni hafa með sér samstarf við rannsóknir og prófanir á stoð- og stuðningstækjum úr framleiðslulínu Össurar, auk grunnrannsókna sem gætu leitt til þróunar á nýrri vöru. Tveimur samstarfsverkefnum er þegar lokið og kom Nýsköpunarsjóður námsmanna að öðru þeirra.

Rannsóknastofa í hreyfivísindum við Námsbraut í sjúkraþjálfun við Læknadeild Háskóla Íslands er vísindaleg rannsóknastofnun. Með hreyfivísindum er átt við öll þau fræði sem tengjast hreyfingum mannslíkamans á einn eða annan hátt. Í tilkynningu sem var send fjölmiðlum vegna samningsins kemur fram að samningurinn geri rannsóknarstofu í hreyfivísindum kleift að efla og þróa sínar rannsóknir enn frekar, m.a. annars með því að nýta sérfræðiþekkingu Össurar á sviði stoð- og stuðningstækja og verkfræði.