Spá: Verðbólgan undir markmiði Seðlabankans allt næsta ár

Greining Arion banka spáir því að mæld verðbólga milli ára verði undir 2,5% markmiði Seðlabankans allt næsta ár. Verðbólgan verði komin undir 2% í febrúar á næsta ári.

Þetta kemur fram í Markaðspunktum greiningarinnar. „Að okkar mati eru allar forsendur fyrir hratt hjaðnandi verðbólgu á næstunni. T.a.m. virðist gengisstyrking krónunnar loks vera skila lækkunum í verðmælingum í nóvember, þrátt fyrir að enn virðist verulegt svigrúm til frekari lækkana á einstaka liðum," segir í Markaðspunktunum.

„Þá eru litlar líkur á því að einhver kröftugur viðsnúningur verði í innlendri eftirspurn á meðan atvinnuleysi er að rísa, kaupmáttur stendur í stað og væntingar á niðurleið. Allir þessir þættir hljóta að skila sér í áframhaldandi hjöðnun verðbólgu. Óvissa í spá okkar snýr að hrávörum úti í heimi er sú hætta fyrir hendi að einhver kostnaðarverðbólga skili sér til landsins vegna þessa. Svo má auðvitað aldrei útiloka veikingu krónunnar."

Bráðabirgðaspá greiningarinnar fyrir næstu mánuði hljóðar svo:

„Desember: +0,10%. Flugfargjöld gætu hækkað á ný eftir lækkun í nóvember, en almennt hækkar þessi liður í desember. Engar aðrar stórar breytingar eru fyrirsjáanlegar í mánuðinum. Húsnæðisliðurinn mun líklega hafa áfram einhver smávægileg áhrif til hækkunar að öðru óbreyttu.

Janúar: -0,50%. Við teljum að útsöluáhrifin verði sterk í janúar (-0,9%, hó hó hó), enda krónan verið að styrkjast án þess að það sjáist í verðlaginu, þar með ætti að vera svigrúm hjá kaupmönnum til að lækka verð á vörum sínum nokkuð hressilega þegar jólavertíðin er á enda. Á móti þessum útsöluáhrifum eru hins vegar skatta- og gjaldskrárhækkanir á vegum hins opinbera, en heildaráhrif vegna þessa eru líklega í kringum 0,45% uppá við í janúar.

Febrúar: +0,45%. Útsöluáhrif ganga að hluta tilbaka í þessum mánuði."

Gangi bráðabirgðaspá greiningarinnar eftir verður tólf mánaða verðbólga komin í 2% í febrúar á næsta ári. Eins verður skattaleiðrétt verðbólga komin niður fyrir 0,9% í febrúar.

Gert er ráð fyrir að eldsneytisverð og húsnæðisliðurinn standi í stað í bráðabirgðaspánni. „Einnig gerum við ráð fyrir hóflegum hækkunum vegna kjarasamninga en áhrifin koma að mestu leyti fram síðar," segir í Markaðspunktunum.