MP Banki tapar fé vegna West Ham

MP Banki tapaði tæpum 1,2 milljörðum króna í fyrra, sem er talsverður viðsnúningur frá rúmlega 860 milljóna króna hagnaði fyrir tveimur árum. Efnahagsaðstæður, 33 prósenta samdráttur tekna, tiltekt í bókhaldinu og kostnaðarsöm uppbygging á viðskiptabankastarfsemi frá grunni lituðu bækur bankans.

Gunnar Karl Guðmundsson, forstjóri MP Banka, segir reksturinn traustan þótt varúðarniðurfærsla á lánasafni bankans hafi sett skarð í afkomuna. „Menn voru í góðri trú . En svo kom í ljós að viðskiptavinir bankans höfðu orðið fyrir enn frekari búsifjum vegna efnahagshrunsins og því varð að taka enn frekari afskriftir,“ segir hann.

Niðurfærslan, sem ekki felst í afskrift lána, hljóðar upp á 1.350 milljónir króna og tilkomin vegna þarsíðasta árs. Þetta jafngildir 35 prósentum af lánasafni bankans. „Við teljum að afskriftirnar nú séu orðnar fullnægjandi,“ segir hann en viðurkennir að ekkert megi útiloka. Annað högg á íslenskt efnahagslíf geti haft í för með sér enn frekari niðurfærslu.

Eftir því sem næst verður komist var tæpur helmingur þeirra útlána sem MP Banki færði inn á varúðarreikning lán til eignarhaldsfélaga. Umfangsmesta lánið sem fært var niður var til félags Björg­ólfs Guðmundssonar, formanns bankastjórnar Landsbankans, vegna kaupa hans á breska Úrvalsdeildarliðinu West Ham. MP Banki tók félagið yfir ásamt Straumi og Byr eftir að veldi Björgólfs hrundi haustið 2008 og á enn hlut í því.

Gunnar vill ekki tjá sig um lánið vegna West Ham en segir lán til eignarhaldsfélaga ekki slæm út af fyrir sig.

Meira máli skipti hvernig tryggingar hafi verið á bak við þau almennt. „Lán til eignarhaldsfélaga eru yfirleitt mjög góð og greitt af þeim,“ segir hann.

jonab@frettabladid.is