3,1 prósents samdráttur milli ársfjórðunga

Landsframleiðsla dróst saman um 3,1 prósent að raungildi milli fyrsta og annars ársfjórðungs, að því er fram kemur í áætlunum sem Hagstofa birti í gær. Á sama tíma drógust þjóðarútgjöld saman um 7,4 prósent, einkaneysla um 3,2 prósent og fjárfesting um 4,7 prósent. Samneysla jókst um 1 prósent. Útflutningur jókst um 2,8 prósent og innflutningur dróst saman um 5,1 prósent.

Greiningardeild Arionbanka telur þessar tölur gefa til kynna stýrivaxtalækkun upp á 1 prósent við næsta vaxtaákvörðunarsdag í lok mánaðar.

Þá kom einnig fram hjá Hagstofunni að landsframleiðsla dróst saman um 6,8 prósent árið 2009 samkvæmt endurskoðuðum tölum yfir þjóðhagsreikninga. Í tilkynningu frá Hagstofu segir að þetta sé mesti samdráttur sem mælst hafi frá því að gerð þjóðhagsreikninga hófst á Íslandi árið 1945.

Þetta boðar lok samfellds hagvaxtarskeiðs frá árinu 1993, en hagvöxtur ársins 2008 er talinn hafa numið einu prósenti.

Aftur á móti jókst útflutningur um 7,4 prósent á sama tíma og innflutningur dróst saman um 24,1 prósent. Það leiddi til 132 milljarða afgangs af vöru- og þjónustuviðskiptum á árinu, borið saman við 42 milljarða króna halla árið áður. Þessi mikli bati varð til þess að samdráttur landsframleiðslu varð mun minni en nam samdrætti þjóðarútgjalda. - þj