FSA hætti við að loka Icesave vegna loforðs ríkisstjórnar Íslands

„Ríkisstjórn Geirs Hilmars Haarde gaf út sumar 2008 að allar innistæður í íslenskum bönkum væru tryggðar," segir Björn Valur Gíslason, þingmaður Vinstri grænna og nefndarmaður í fjárlaganefnd Alþingis.

Hann segir að sumarið 2008, stuttu fyrir hrun, hafi breska fjármálaeftirlitið (FSA) viljað loka útibúi Landsbankans af ótta við að það gæti farið eins og það fór. Þá fullvissaði ríkisstjórn Geirs bresk yfirvöld um að ríkið stæði á bak við innstæðutryggingasjóð til þess að standa við skuldbindingar gagnvart íslensku bönkunum og það hafði áhrif á að útibúinu var ekki lokað.

„Útibúin í Bretlandi voru íslensk," bætir Björn Valur. Hann segir að síðan hafi tvær ríkisstjórnir til viðbótar komist að þeirri niðurstöðu að ríkið ábyrgist innistæðurnar.

Evrópuþingmaðurinn, og einn af höfundum tilskipunar innstæðutryggingakerfis ESB, Alain Lipietz, sagði í Silfri Egils í dag að Íslendingar bæru ekki ábyrgð á skuldunum vegna þess að ábyrgð gistiríkis væri miklu meiri en Bretar og Hollendingar hafa haldið fram hingað til. Meðal annars áttu fjármálaeftirlit þessara landa að hafa eftirlit með útibúunum. Því er lagaleg staða þeirra veik að mati Lipietz.

Að sögn Björns Vals er þetta gömul umræða og þetta hafi verið eitt af fyrstu atriðunum sem tekist var á um. En vegna þess að breska fjármálaeftirlitið vildi taka í taumana sumarið 2008, en hætt við vegna yfirlýsinga íslenskra yfirvalda um að íslenska ríkið styddi við bakið á tryggingasjóðnum, sé staðan orðin heldur snúin.

Björn Valur bendir svo á að í Brusselviðmiðunum standi í fyrstu greininni að innstæðukerfið hafi verið innleitt á Íslandi, „og við förum eftir því," segir Björn Valur að lokum.