Búðarháls í hægagangi

Vinnu við Búðarhálsvirkjun er haldið í lágmarki með aðeins sextán starfsmönnum. Framkvæmdir komast ekki á fullan skrið fyrr en Landsvirkjun tekst að afla lánsfjár í útlöndum.

Vinnubúðir eru risnar við Sultartangalón, malbikaður vegur kominn alla leið og meira segja ljósastaurar við heimreiðina. Mánuður er liðinn frá því starfsmenn Ístaks mættu með fyrstu tækin á svæðið og í byrjun vikunnar hófu þeir sprengingar til að víkka út mikla hvelfingu sem gerð var fyrir átta árum, sem verður inntaksþró fyrir stöðvarhúsið.

Verkið fer rólega af stað. Benedikt Benediktsson, verkstjóri hjá Ístaki, segir að þeir séu nú sextán talsins, með starfsmanni mötuneytis.

Þetta eru fyrstu virkjanaframkvæmdir á hálendinu síðan Kárahnjúkar kláruðust. Þar var meirihlutinn útlendingar en hér sjáum við bara Íslendinga. Benedikt segir að eingöngu Íslendingar séu þarna að störfum núna og kveðst vona að svo verði áfram, enda veiti ekki af að ganga á listana yfir þá sem eru á atvinnuleysisbótum.

En færri komast að en vilja. Margir sækja um og þeir sem eru ráðnir hafa margir mikla reynslu af svona vinnu. Meðal þeirra er sprengistjórinn, Þórir Sverrisson. Hann byrjaði 1983 á hálendinu og vann í Kvíslaveitum, Hrauneyjum og Sultartanga, einkum við boranir og sprengingar. Bergið við Búðarháls segir hann lélegt og það þurfi ekki mikið dínamit til að sprengja það.

Ístak hefur aðeins heimild til að vinna takmörkuð undirbúningsverk fyrir allt að 500 milljónir króna, eða sem svarar 5% af um 10 milljarða verksamningi. Þannig hefst smíði stöðvarhúss ekki fyrr en Landsvirkjun hefur tekist að tryggja sér lánsfjármögnun. Fyrr komast framkvæmdir við Búðarháls ekki á fulla ferð.

Forstjóri Landsvirkjunar, Hörður Arnarson, sagði á haustfundi fyrirtækisins, að Icesave-deilan væri meðal þess sem truflaði fjármögnun. Þá hefur Vísir áður greint frá því að Fjárfestingarbanki Evrópu hafi ítrekað frestað því að afgreiða lán til Landsvirkjunar, með óformlegum skilaboðum um að frestunin tengist Icesave-deilunni.