Jóhannes Jónsson hefur greitt fyrir helminghlut í SMS

Jóhannes Jónsson stofnandi Bónuss hefur í dag ásamt erlendum fjárfestum greitt til Arion banka hf. kaupverð á helmingshlut í færeyska verslunarfélaginu SMS. Áður hefur komið fram að verðmæti þessa hlutar sé um 450 milljónir kr.

Í tilkynningu segir að SMS er stærsta verslunarfyrirtæki í Færeyjum. SMS rekur meðal annars verslanir undir nafni Bónuss.

Fyrirtækið er í góðum rekstri og með sterkan efnahag. Jóhannes segir þetta spennandi verkefni og félagið hafi áhuga á að auka innflutning á íslenskum vörum til Færeyja.

SMS rekur níu verslanir í Færeyjum, ásamt því að reka framleiðslubakarí og kjötvinnslu. Velta félagsins á þessu ári er um 7 milljarðar íslenskra króna. Félagið er skuldlaust.