David Cameron vongóður um árangur í Icesavedeilunni

David Cameron forsætisráðherra Bretlands er vongóður um að árangur sé að nást í samningaviðræðum við Íslendinga í Icesavedeilunni. Greint er frá þessu á fréttavef Nasdaq kauphallanna þar sem rætt er við talskonu ráðherrans.

„Við vonum að árangur sé að nást," segir talskona forsætisráðherrans í samtali við fréttavefinn. Á honum eru rifjaðar upp fregnir helgarinnar um að lausn sé hugsanlega í sjónmáli í þessari deilu og að drög að samkomulagi hafi verið kynnt stjórnarandstöðunni.

Á fréttavefnum segir ennfremur að von sé á Jóhönnu Sigurðardóttur forsætistráðherra Íslands til London á ráðstefnu í næsta mánuði og að samkomlagið gæti þá legið fyrir. Ráðstefnan er haldin á vegum breskra stjórnvalda en hana sækja ráðherrar frá öllum Norðurlöndunum.