FME gerir athugasemdir við starfsemi Sparnaðar ehf.

Á vefsíðu FME segir að framkvæmd var athugun á starfsemi Sparnaðar ehf., vátryggingaumboðsmanns Bayern Versicherung Lebensversicherung (VKB), með heimsókn og gagnaöflun 18. maí 2009. Athugunin beindist að því að skoða starfsemi Sparnaðar ehf., þá sérstaklega upplýsingagjöf og kynningarefni viðskiptavina á Séreignatryggingu.

Í kjölfar athugunarinnar rituðu fulltrúar Fjármálaeftirlitsins skýrslu þar sem fram komu athugasemdir eftirlitsins og kröfur um úrbætur er skyldi vera lokið innan nánar tiltekinna fresta. Voru drög að skýrslunni afhent framkvæmdastjóra Sparnaðar ehf. ásamt tengilið þýska félagsins þann 6. nóvember 2009 og þeim gefið tækifæri til að koma sjónarmiðum félagsins og frekari upplýsingum á framfæri.

Í endanlegri útgáfu skýrslunnar þann 3. mars 2010, var tekið tillit til þeirra athugasemda eftir því sem tilefni þótti til.

Meðal þess sem FME gerði athugasemdir við var að á samningseyðublaði um Séreignatryggingu væri óljóst hver viðsemjandi væri.

Gerð var athugasemd við að ekki væri tilgreint á samningseyðublaðinu hver vátryggingaumboðsmaður fyrir VKB væri hér á landi. Þá var einnig gerð athugasemd við að ekki kæmi fram á samningseyðublaðinu að viðskiptavinir gætu snúið sér beint til vátryggingaumboðsmanns VKB hérlendis, þ.e. Sparnaðar ehf., varðandi riftanir og uppsagnir samninga. Viðskiptavinum er einungis vísað beint til þýska félagsins erlendis.

Gerð var athugasemd við að ekki væri upplýst um efni þeirra þýsku lagaákvæða, sem viðskiptavinir eiga að staðfesta að farið hafi verið eftir, í kynningarefni til viðskiptavina samanber lög um vátryggingasamninga.

Fjármálaeftirlitið gerði athugasemd við að tryggð ávöxtun væri sögð 2,25% í skilmálum VKB en ávöxtun er í raun 1,38% þegar búið er að taka tillit til kostnaðar.

Gerð var athugasemd við skilmála VKB, en þar eru ákvæði sem ekki eru í boði hér á landi eða samræmast ekki íslenskum lögum.

Gerð var athugasemd við að sjóðfélagar fengju ekki yfirlit sem innihéldi upplýsingar um inngreiðslur í evrum og krónum fyrir hvert tímabil ásamt samantekt á nafnverðsgreiðslum og inneign (réttindum).

Unnið er að úrbótum á ofangreindum atriðum hjá Sparnaði ehf. og VKB, að því er segir á vefsíðu FME.