Greining: Seðlabankinn talar með tveimur tungum

Greining Arion banka hefur gagnrýnt Seðlabankann harðlega og segir bankann tala með tveimur tungum þegar kemur að afnámi gjaldeyrishaftanna.

Fjallað er um málið í Markaðspunktum greiningarinnar. Þar segir að ekki sé til nein ein áætlun um afnám hafta. Enn er langur tími þar til að þau skilyrði sem sett hafa verið til grundvallar afnámi hafta verði uppfyllt

Slík áætlun verður mótuð af þremur aðilum, stjórnmálamönnum í ríkisstjórn, Alþjóðagjaldeyrissjóðnum og seðlabankamönnum.

Þá segir að Seðlabankinn tali tungum tveim eftir því hvort hann vill tala við fjármálamarkaðinn en þá er lögð áhersla á hægð og hófsemi eða hvort talað er til stjórnmálamanna en þá er reynt að þrýsta á um afnám hafta og markaðsfrelsi. Þetta hafi valdið nokkrum ruglingi á fjármálamarkaði.

Greiningin telur að íslensk stjórnmálastétt mun án efa reyna að draga lappirnar í afnámi haftanna til þess að reyna að varðveita þann brothætta stöðugleika sem náðst hefur.