Staða lífeyrissjóðanna svipuð og 2006

Þrátt fyrir hátt í 800 milljarða tap lífeyrissjóðanna í hruninu er staða sjóðanna svipuð og hún var árið 2006, segir Guðmundur Ólafsson, hagfræðingur. Hann segir að yfirmenn lífeyrissjóða hafi staðið sig vel.

Guðmundur Ólafsson, hagfræðingur við Háskóla Íslands, telur að tap lífeyrissjóðanna vegna hrunsins slagi upp í 800 milljarða króna. Þó sé mikil óvissa um þetta, ýmis gögn hafi ekki enn komið fram og óvissa sé um tap ýmissa félaga sem lífeyrissjóðirnir hafi fjárfest í.

„En það breytir ekki því að miðað við ávöxtunina sem var fyrir hrun, þá var árum saman ávöxtun sjóðanna 25-30% af eigið fé, þannig að þó að þeir tapi einhverju af þeirri froðu til baka þá er það ekki mikið mál, eftir stendur að mig minnir að staða sjóðanna sé svipuð og hún var 2006 - og það verður að teljast afar viðunandi niðurstaða," segir Guðmundur Ólafsson.

Finnst þér eðlilegt að sömu menn sitji þarna á sömu launum og fyrir hrun eftir þetta mikla tap?

„Já þeir hafa staðið sig vel, það verður bara að viðurkenna það - en hitt er annað mál að auðvitað má breyta skipulagi og þess háttar en ég held t.d. að það væri tvennt sem væri mikið óráð, það væri að flytja lífeyrissjóðina inn í bankana, ekki er nú lýðræðið meira þar og það gafst mjög illa eða láta stjórnmálamenn sjá um þetta - það væri enn verra," segir Guðmundur Ólafsson.